في علاقات بتستهلكك وتحرقك .. أبرزها اللي الطرف التاني فيها دايمًا معارضك، دايمًا حاطك ف مشاكل مبتنتهيش .. مبيتراضاش مهمًا عملتله .. ضاغطك فالبيت، ضاغطك ف الشغل، ضاغطك ع السوشيال ميديا .. كل كلمة معاه بحساب .. يقلبلك اي كلمة حتى لو بحسن نية لجريمة كبيرة.
دايمُا شايفك غلطان، كل ردود افعاله هجومية، مبيبطلش يشتكي .. الاكل مش عاجبه، اللبس مش عاجبه، القناة دي مش عجباني، مبيشوفش اي شيء بتعملهوله إلّا إنُه حقه وده دورك وواجب عليك .. الجحود ابرز صفة فيه ..
العلاقات دي علاقة استهلاكية، بتهلك روحك، جسدك، عقلك، بتخليك مُشتت .. وطول ما انت ف علاقة من النوع ده عمرك ما هتتقدم خطوة .. وطول ما انت بتسكت هتلاقي تحت عيونك يبدأ يسود، وزنك يزيد وتاكل بشراهة نتيجة كتمانك الغضب اللي انت فيه .. تقصر ف شغلك، وحياتك تمشي لورا .. وأول ما يجرالك حاجة او تبدأ تقصر فعليًا مع الطرف ده. يبدأ هو ينسحب .. ماهو من البداية مش أبن أصول .. هو بيصنع منك مريض نفسي وفي الاخر كمان بيتخلى عنك.
عشان كده لازم ناخد بالنصيحة الابدية .. متجيش ع نفسك عشان خاطر حد .. نفسك أولًا.