ابتسم
عزيزى المواطن
صباح الفل , انت متعرفنيش .. انا بس ببعتلك الجواب ده علشان لو مكتئب او متضايق
افكرك ان السعادة موجوده تحت رجليك بس انت اللى مش واخد بالك .
السعادة موجوده لما تفتح الراديو بالصدفة وتلاقى الاغنية اللى بتحبها لسه فى اولها
لما تقف عند عربية الفول بالظبط فى اللحظة اللى بيوصل فيها العيش الطازة
لما تبقى مستعجل ويفوتك الاتوبيس وتلاقى توصيلة احلى من الاتوبيس
لما تقدر تصلح حنفية البيت او الاباجورة البايظة من غير صنايعى
لما تطلع الهدوم الصيفى وتلاقى فى جيب القميص 10 جنية منسية
تفتح التلفزيون بالصدفة فتلاقى قدامك يونس شلبى فى مسرحية العيال كبرت
السعادة موجوده فى طفل متعرفوش , يبصلك فجأة ويضحكلك
لما اللعيب اللى بتحبه يرجعله مستواه ويجيب جون
السعادة موجوده لما تخطف ساعة نوم العصر فتصحى تلاقى الصداع راح
فى كوباية شاى بالنعناع مطلبتهاش , تلاقيها قدامك فجأة مظبوطة فى معادها
لما تفكر فى الاقساط اللى خلصتها مش اللى لسه عليك
لما تلاقى قاعده الاكل مفيش حد من الحبابيب غايب عنها
لما تكتشف انك كنت صح لما سبتها كلها على الله وانك كنت صح لما صدقت اوى …
اتمنى الجواب ده يفرق معاك فى بداية يومك ,
فتنزل الشارع بتضحك
احنا منعرفش بعض بس احتمال اعرفك لو اتقابلنا صدفة
هعرفك ازاى ؟
من ابتسامتك طبعا !…
( عمر طاهر )