واحد وقفني شكله محترم جدا .. بيقولي أستاذنك ممكن 15 جنيه .. الولد بيعيط وعاوز سندوتش
أنا بصراحة إفتكرته في الأول حد من اللي بيتسولوا بالطريقة دي أو بيستغل الولد في التسول
لكن طريقته في الكلام مش طريقة حد بيحور .. بصيت بطرف عيني لقيت ولد فعلا صغير ميتعداش سنه 5 سنين مفحوم من العياط
قلتله هو عاوز سندوتش إيه ؟
قالي سندوتش برجر ومش راضي يتحرك لما شم ريحته وشاف شكله في المطعم
قلتله أنا عنيا بس هجيبلك سندوتش مش هديك فلوس .. وخدت خطوتين في إتجاه الولد ووطيت عليه وسألته مالك يا حبيبي
قالي وهو بيعيط : عاوز سندوتش برجر .. نفسي فيه وابويا مش راضي
الجملة دخلت في قلبي زي السهم .. حضنته وطبطبت عليه وبوسته وقلتله انا هقنع بابا يجيبهولك
وخدت والده على جنب .. الراجل قالي وهو بيحاول يمسك الدمعة اللي فلتت منه غصب عنه : والله أنا ما شحات ومعرفش أنا عملت الحركة دي إزاي ..ومراتي لو عرفت هتطلب الطلاق .. بس أعمل إيه يعني .. إحنا في نص الشهر والمرتب خلص .. ده إحنا مروحين مشي عشان ممعايش فلوس أركب .. وقلتله هنتمشى نتفرج على المحلات .. وياريتنا ما اتمشينا .. أول ما شم ريحة البرجر وشاف شكله وقف يعيط ويدبدب وحالف ما يمشي ..طالبه مني بقاله ييجي سنة .. وأنا لو حلفتلك بالله إني ما عارف أوفر 20 جنيه أجييله بيهم السندوتش هتقول بكدب وبزودها
وإنفجر الراجل في الكلام وكأنه بيفضفض وراح قايلي : يا أخي بص .. وقلع الجزمة لقيته لابس كيس بدل الشراب
وكمل وهو بيشاور على رجله : أنا مش عارف أجيب لنفسي شراب
مدرتش بنفسي غير وأنا بحضنه .. سابني وجري على الواد شده من إيده لدرجة إن الواد وقع على الأرض : وقاله يلا يا إبن الكلب بقى فضحتني
والواد حاله بجد يقطع القلب من العياط .. جريت عليه وخدت الواد بعد ما هديته وطلبت منه يستنانا دقيقة .. وقلت للولد بابا أداني فلوس أجيبلك السندوتش .. ورحت جبتله سندوتش البرجر .. أول ما مسكه وحطه على بقه.. ضحك ضحكة عمري ما هنساها وسابني وجري على أبوه وحضنه وقعد يبوس فيه
ساعتها قررت إني أختفي من قدامهم .. وقعدت على أول رصيف قابلني .. يا الله .. حسيت إحساس مميت .. وعيطت .. عيطت كتير .. ودعيت ربنا ساعتها إنه يجبر بخاطر الناس دي ويمنحهم الصبر والقوة .. حاجة بسيطة أوي في حياتنا بالنسبة لناس تانية حلم .. طفل صغير نفسه في البرجر وأبوه راجل مطحون قرر إنه يكسر نفسه عشان يفرح إبنه .. صعبة لحظة الإنفجار .. كسرة النفس ربنا ما يكتبها على حد
حقيقي الكلام مكتوم والروح مخنوقة .. يارب أجبر بخاطر الناس دي “❤
