اكيد كلنا حلمنا هو تحقيق ذاتنا ومعلش كلامي هيبدا بالبنات
وبنسأل نفسنا ديما عن الطريقة اللي بيها نحقق الموضوع ده ..
لا وكمان بنسمع كتير من الناس بيقولوا الكلمة دي
وكمان البنات تلاقي واحدة بنت تقف كدا وتقولك انها عايزة تحقق ذاتها 🙂
كل ماحد يكلمها تقولوا احقق ذاتي الاول
والكثير بتسال عن معني تحقيق الذات وبيقول اكيد هو حاجة كويسة برضوا
وبعد بحث وتنقيب عرفنا ان تحقيق الذات هو
ان الواحد يحقق هدف في الحياة يخلي الناس تبصلوا علي انوا شخصية ماحصلتش
طبعا ده الكلام اللي من الاخر ….
بعيدا عن اي مبررات ممكن تحصل
عجبني الموضوع قوي وقولت مابدهاش بقي لازم الواحد يحقق ذاته
المشكلة كانت في الطريقة … طبعا انك تلاقي الطريقة مشكلة بس علي مين ؟؟!!
خلينا نبدأ من البداية ….
طبعا انا اول ما عجبني الموضوع مشيت في السكة ….
بس وقفت عند ازاي ؟؟؟…
بس انا قولت ارتب افكاري… واستنجاتي… يمكن اعرف ومسكت اول خيط
دورت علي اكثر الشخصيات اللي محققة ذاتها فيا العالم
ومشيت وراها وعرفت السر
وانا هقولكم عليه واكسب فيكم ثواب…
شوفوا احنا البنات بنكبر بسرعة -علي فرة انا سمعتهم بيقولوا كدا –
احلي ايام عمرك لما تكوني مع اصحابك وعيلتك وانتي في قمة شبابك
تروحي المدرسة وتجري وتلعبي وسط الفسحة
وتروحي الدرس وترغي مع صحباتك
وتبصي تلاقي نفسك طلعتي من الثانوي وبقيتي في الجامعة
وهناك بقي عالم تاني خالص
كل حاجة بتتغير … مابقتيش البنوتة اللي انتي كنتي عليها
ويمكن وسط كل ده ولانك مش متعودة علي وجود كل الناس دي في مكان دراستك
ومابقتش البنت المشهورة وسط صحباتها ولا الدنيا صغيرة ومحدودة زي مااتعودتي
وتلاقي بيقولوا علي نشاط كدا ولا كدا وتشتركي فيه
والعملية تعجبك وتبصي تلاقي نفسك …في المسابقة الفلاينة …
ولا رئيسة حاجة معينة ….ولا فايزة بجايزة ما اعرفش ايه…
وتسارفي وتروحي وتيجي وتلفي اماكن كتير وتبقي مشهورة وسط معارفك
او بلاش كل ده وتكوني بنت دماغها في الشغل وبس محضرة نفسك ان تشتغلي ..
وتعدي تنادي بامور الماوا والكلام الغريب الي بنسمع عنه ده
تكبري شوية … وتبصي تلاقي مامتك داخلة عليكي في يوم كدا وبتقولك احنا جايلنا ضيوف بكرة ولازم تكوني موجودة
وانتي تستغربي وتقوليها ليه وانا مالي ..
وتعرفي ان فيه واحدة جارتكم جايبلك عريس … بتقول انك بنت حلال
وانتي تتنرفزي تقولي لمامتك لا لا ياماما مش وقت الكلام ده انا عايزة احقق ذاتي ….
الناحية التانية نيجي ليك انت ياسي ادم
بتلعب ليل نهار في الشارع كورة مع صحابك وتلاقي حد نده عليك يقولك كفاية لعب عندك درس اطلع بقي
وتعدي الثانوية بمرها وتدخل كلية ملهاش اي علاقة باللي كنت حاطه في بالك
وتبقي داخل الكلية عايز تتعرف علي خلق الله كلهم
وتعمل نفسك دنجوان عصرك واوانك
وتكبر شوية
وتلاقي بابا بيقولك اشتغل او ممكن تعملها انت لوحدك
ومرة وانت وصحابك ماشين في الكلية تلاقوا اعلان عن نشاط عملاه الجامة
وتبصوا للورقة وواحد يقول طب منجرب ترد عليه وكانه بيقولك نكته
ياعم صلي علي النبي بلاش كلام فاضي
خلينا في شغلنا عايزين نكون نفسنا ونحقق ذاتنا
هي ايه الحكاية فين الطريقة اللي هتوصلنا لمرادنا ايه كل ده
معلش خليكوا معايا انا هفهمكوا كل حاجة حالا ….
احلي حاجة ان الواحد يستمتع بشبابه ويقضيه في حجات مفيدة ومليانة وبترفه عنه
اي كان اهتمامه
لكن لازم يجي وقت وكل ده يوقف
كل واحد لايزم يعيشها صح
عيش واتنطط واجري
لكن هيجي وقت ولازم يبقي عندك بيت واسرة
ماينفعش سعتها تجري وتقولي احقق ذاتي
ولا انت ياسي ادم الشغل وانك اخر النهار تعد قدام ماتش كورة ولا تقضي وقت مع صحابك طويل حبتين مافيهوش فايدة … ولا قاعدة علي الكمبيوتر ملهاش اي لازمة وبتضيع وقتك …
ولا ماشي تغلس علي الناس …
وتقول ان هو ده الكلام المظبوط واشتراكك في اي نشاط و اللي مالوش لازمة
( طبعا هي حجةعلشان العملية مافيهاش مقابل مادي..)
يوم ماتكوني ام كوني ام بجد اوعي تكوني ام لمجرد ان دي سنة الحياة
يعني ماتبصيش للجواز بشكل سطحي
وانت كمان
لازم لماتعملوا الحياة الجديدة دي تكونوا قدها
يوم مايبقي عندك بيت وزوج وانتي مقدمالهم كل فروض العناية والطاعة
ده مش هيقلل منك او هيخليكي تحت او حتي هيمنعك من تحقيق ذاتك
لما تربي اولاد صالحين
لما تطيعي زوجك وتعتني بيه
وربنا يكون راضي عنك
لما تخدي بالك من امك وابوكي
ومن كل اللي محتاجنلك
سعتها يابنوتة …هتحققي ذاتك
سيبكم من كلام الدنيا وخليكم في الاخرة اجمعولها علي قد ما تقدروا
انتي مش هتخسري
لما تعملي كل ده هتكسبي كتير .. كفاية كسب الاخرة … كفاية رضاء الله
وانت كمان اتقي الله في كل افعالك …. وعيش صح
يوم ماتبقي شاب صالح
بيعمل كتير وكتير علشان ربنا
وتساعدها انكم تعملوا بيت قائم علي طاعة ربنا
يبقي انت حققت ذاتك
انتي ياحواء وظيفتك هي حماية القلوب وادم مايقدرش يعمل ده مكانك
وانت يا ادم وظيفتك انك تحتوي حواء وتخلي بالك منها
كل واحد ليه رسالة ووظيفة التاني مايقدرش يعملها
لما نتقن اللي احنا شاطرين فيه … يبقي كدا حققنا ذاتنا
حاجة اخيرة الناس المشهورين والي حققوا ذاتهم وانا اتعلمت منه هما امهات المؤمنين
وشوف آل البيت والرسول واتعلم منهم
اتمني الرسالة تكون وصلت
دي كانت محاولة بالعامية لرسم لخبطة صورة من صورالواقع ومحاولة فكها وتصحيحها…
استنوني في لخبطة جديدة …
وقل لن يصيبنا الا ماكتب الله لنا
لاتسوني من دعائكم
وصلوا علي الرسول ….