إحساس إن محدش فاهمك ولا حاسس بيك ده إحساس مُتعب جدًا ساعات الواحد بيختار إنه يكون لوحدة بدون أي أسباب ، لا عايز يتكلم مع حد ، ولا يرد على حاجة والسبب مش مفهوم لا ليك ولا لغيرك ، الحكاية كلها إنك بيجى عليك وقت بتمر بحالة من اللامُبالاة اللى هو ملكش مزاج ولا نفس تعمل أي شيء ، لكن اللى حواليك بيُفسِّره الحالة دى بميت شكل وميت لون ..
اللى بيفسّرها على إنك غامض ومش عايز تحكي… واللى بيشوفك على إنك متغيّر معاه وحد جديد دخل حياتك و أخد مكانه ، واللى بيحس إنه مش محلّ ثقه ولا إنه بالأهمية اللى تخليك تحكيلُه على اللى فيك بالتفاصيل اللى أنت نفسك مش عارفها !
وتتراكم الأحداث دي كلها عليك خلاف اللى أنت فيه ، وكل ده فى نفس الوقت اللى أنت محتاج فيه إنك متفكرش فى أي شيء لأنك مُرهق ومُمزّق من الداخل للحدّ اللى مخليك مش قادر تحدد سبب الألم النفسي اللى أنت بتعاني منه ومسيطر عليك من كل اتِّجاه ..
– لكن إن حد يفهمك بجد او يلتمس لك العُذر او يحترم رغبتك فى السُّكوت ، ده اللى مش ممكن حد يفكّر فيه نهائياً