لا تكن سببا في عقد الآخرين كن أنت السند والحافز

في احد اللقاءات مع رجاء الجداوي سألوها بتعرفي تطبخي
ردت انا استاذه مطبخ !

جدتي كانت بتقولي انتي سمره مش زي اخواتك
هتتجوزي راجل علي قده ومش هيقدر يجيبلك اللي يخدمك اتعلمي بقي الطبخ عشان تنفعي نفسك
رجاء الجداوي السمره الوحشه كما هو العرف ف بلدنا اللي لحد دلوقتي مش قادرين يفسروا الظاهره الكونيه الغريبه اللي خلت السمرا تتجوز الامير هاري
واللي متأكدين ان اكيد دينا الشربيني السمرا برضو ٢٤سنه عملت له عمل في ديل سمكه في المحيط لعمرو دياب ٥٢ سنه عشان تجيب رجليه
رجاء بقت عارضة ازياء ممثله اتجوزت لاعب كوره مشهور ولحد دلوقتي وبالرغم من سنها من اكتر الممثلات اللي في سنها شياكه وجمال
اللي لما تسمع اللحظات الاخيره لوفاة جوزها وازي حبه وتعلقه بيها عينك تدمع من كمية الحب والاخلاص
هي دي مشكلتنا بنعيش عمرنا في مجتمعنا نجيب العقد لاطفالنا ولنفسنا ونتعس حياتنا وحياتهم في مفاهيم عبيطه
مناخير مفنشه بق واسع شعر منعكش رجلين مسلوعه وتخينه ورفيعه سمره

ونسود حياتنا ونقدم للمجتمع طفل مهزوز ضعيف الشخصيه مش واثق من نفسه سهل اي حد يكسره وكل دي عشان شايف مناخيره مفنشه او تخين شويه عن اصحابه
لما لاقي ام بنتها اختارت صندل مكشوف ومامتها تقولها مش هينفع رجلك فيها عرقوب
عرقوب ؟؟؟؟؟؟؟؟

حضرتكم متخيلين نفسية الطفله اللي مامتها المفروض تحسسها انها اميرة الاميرات عرفتها انها عندها عرقوب ومش حلوه
متخيلين البنت دي وردة فعلها قصاد اي شاب مستهتر يقولها كلمه حلوه او بحسسها انها جميله
بصي حواليكي وهنتاكد لا بشعر ولا لون عيون ولا لون بشره وشعر
الجمال نسبي ووجهات نظر والسعاده محدش يعرف هي فين
ولا اي واحده عينها زرقه وشعرها اصفر هتتجوز امير
ولا كل واحده ماتمتلكش المواصفات دي هتتجوز الغفير
ولا كل اللي اتجوزت امير عايشه في قمة السعاده
ولا اللي اتجوزت الغفير عايشه منتهي التعاسه