محاسبة تكاليف

مقدمة

محاسبة التكاليف دى من أصعب ومن أهم فروع المحاسبة بس ناس كتير مبتحبهاش أو تصتصعبها
فى السلسلة دى هتفهم كل حاجة تخص محاسبة التكاليف بطريقة بسيطة وسهلة جداً
السلسلة إعداد أستاذ / أحمد سلام
تقديم وعرض / يوميات محاسب
تعالو ا نبدأ أول جزء

بقولك ايه ما تيجي نفهم مع بعض كدا الناس بتوع المحاسبة دول بيقولوا ايه
بوص يا سيدي في حاجه اسمها محاسبة تكاليف
Cost ِAccounting
ايوه مالها دي
دي ياسيدي معموله علشان تبقي فاهم المنتج اللي انت بتبيعوا دا بيتكلف كام
يا سلام طيب ما كل اللي صرفتوا و خلاص
طيب استني بس
بيقولك ان الفلوس اللي انت صرفتها دي ليها تقسيمات
بص يا سيدي اول حاجه
Manufacturing vs. Non Manufacturing
ايه دا يعني ايه
• يعني تكاليف صناعية و تكاليف غير صناعية
مش فاهم
طيب خد عندك
بالنسبه للصناعية
Manufacturing cost
مش في عندك تكاليف مواد و تكاليف اجور و كمان تكاليف غير مباشرة زي الايجار
امسك يعني ايه غير مباشره دي كمان
يعني ياسيدي اي تكاليف خاصة بالانتاج بس بطريق غير مباشر زي ماقولنا الايجار والكهرباء و صيانة الات الانتاج
Direct materials
Direct labor
Manufacturing overhead
مين دول كمان
ياعم دول هما اللي فوق المواد المباشرة و الاجور المباشرة و التكاليف الصناعية الغير مباشرة
ايه دا يعني ممكن اقسم التكاليف الصناعية دي ل مباشرة و غير مباشره
Direct and indirect
ايوه بالظبط كدا و هنعرف بعدين بنقسمهم ليه
طيب كدا فهمنا الصناعية
طيب و الغير صناعية
Non Manufacturing
دي يا سيدي تقدر تقول انها كل المصاريف اللي حضرتك بتصرفها علشان تحول المنتج اللي خلاص جهز دا لفلوس تاني
يعني ايه ؟!
يعني تكاليف البيع التسويق و الدعاية
Selling (marketing) expenses
تكاليف الادارة
Administrative expenses
بس خلي بالك تكاليف الادارة دي ممكن تكون صناعية و ممكن تكون غير صناعية
نعم و دا اللي هوا ازاي يعني
بوص يا عم
لو مرتب مدير الانتاج مثلا دا يبقي من الصناعية
طيب لو مرتب مدير التسويق
دا بقي كدا غير صناعية
خلصنا التكاليف الصناعية و الغير صناعية
Manufacturing & Non manufacturing
تعالا بقي للتقسيم التاني

• تكاليف منتج و تكاليف فترة
Product vs. period
نبدا بالمنتج
مالوا
بوص يا سيدي تكلفة المنتج دي او ما يقال عنها تكلفة تخزينية
Inventoriable cost
ايه يا عم الكلام الكبير دا
معلش معلش ركز معايا مش انت صرفت فلوس
اهو جزء من الفلوس دي اتجمعت كلها في صورة منتج زي مثلا تكلفة المواد الخام
هنقول مثلا ان عندك مصنع و انتجت منتج
و جيت اخر السنة عاوز تعرف المخزون بتاعك اللي في المخزن دا بكام
علشان كدا اتقسمت التكلفة جزء المنتج

والجزء التانى تكاليف الفترة
Period cost
ملها دي كمان
دي بقي الباقي
يعني كل التكاليف المرتبطة بمرور الوقت حتي لو مانتجتش اي حاجه
زي الدعاية
طيب و استفدت ايه انا بقي
بوص يا سيدي هتيجي انت ك محاسب او ك صاحب مصنع في اخر السنة تاخد تكاليف المنتج تحطها في الميزانية علي انها اصل
اشمعنه
علشان انت خدت المواد و حطيت عليها شوية اجور و طلعت في الاخر منتج
مش المنتج دا بقي بفلوس
اه
يعني انت مخزونك زاد علشان كدا قولنا عليه تخزيني
و تاخد تكاليف الفترة تطلعها ك مصروف
لان تكاليف الدعاية دي مش موجوده في المخزون هيا اه ليها مردود بس متقدرش تبيعوا ولا هوا عندك اصل

‫• التكاليف المباشرة و الغير مباشرة
Direct vs. Indirect costs
عندي 3 حاجات لازم تعرفهم الاول قبل مانتكلم عن التكاليف المباشرة و الغير مباشرة

1- النطاق ذو الصلة Relevant range
مين دا يا عم ” هقولك “
لو انت عندك مصنع كراسي بتدفعلوا ايجار 1000 جنيه في الشهر هل دا ليه علاقة بالانتاج ؟
لا . انتجت كرسي واحد هتدفع ال1000 انتجت 1000 كرسي هتدفع برضوا ال 1000 صح ؟
لا . مش ديما صح ” ليه يا عم الحج ؟ “
هقولك ليه لو انت مساحة المصنع بتاعك متستحملش غير انك تنتج 800 كرسي بس
مش هتعرف تنتج ال 1000 الا لما تاجر مصنع كمان
فالايجار زاد صح ” عاوز توصل لايه ؟ “
عاوز اوصلك ان ال 800 دول هما بقي ال
Relevant range بتاعك
او هما النطاق اللي تقدر تتحرك خلاله من غير تغير في التكلفة

2- Cost object
المعلم دا هوا السبب في التكلفة هوا اللي بيدفعني فلوس
زي المنتج اللي بتنتجوا ( الكراسي ) او الموظفين اللي شغالين

3- Cost driver
دا بقي المحرك الاساسي للتكلفة ” مش فاهم “
هفهمك مش قولنا الموظفين بندفعلهم فلوس ” ايوة “
اكيد الفلوس دي مقابل ساعات عمل بيشتغلوها ” اكيد “
امسك بقي في ساعات العمل دي هيا ال cost driver
مثال عندي عامل بيشتغل الساعة ب 10 جنية و اشتغل 5 ساعات
يبقي مرتبه 10 جنيه * 5 ساعات ب 50 جنيه
نرجع بقي للتكاليف المباشرة
Direct cost
هي التكاليف اللي ببساطة ممكن تتبع المسبب في تكلفتها
زي المرتبات 5 ساعات ب 50 جنيه
طيب و الغير مباشرة
Indirect cost
دي بقي مش بسهولة تتبع التكلفة لازم تعمل قرد ” مش مصدق ؟ خد عندك “
تكلفة التأمين – الصيانة – التخزين – التليفونات .