هل يعتبر الاهلاك مصدر للنقديه؟
الاجابه نعم يعتبر مصدر للنقديه
طيب ازاى وهو اصلا فى حكم المصروف؟
فى مفهوم مهم جدا بنستخدمه فى الاقتصاد وفى مجالات دراسة الجدوى اسمه مفهوم الفرصه البديله المفهوم ده بناخده فى اعتبارنا لما بنقارن مابين اي بديلين ببعض ويمكن بنطبقه فى حياتنا عادى من غير مانكون عارفين زى اى انك مثلا انك بتفاضل مابين تركب قطر مكيف وتستريح فى السفر او قطر عادى وتوفر فى التكلفه ولما تختار اى بديل منهم هاتضحى بحاجه اما التكلفه او الراحه.
أهم المفاهيم المحاسبية (مفهوم الفرصة البديله)
نفس مفهوم الفرصه البديله ده بيعتبر ان الوفر فى الانفاق بيعتبر ربح محقق، الوفر فى الانفاق بيعتبر ربح محقق دا من منظور اقتصادى بعيدا عن المنظور المحاسبي تماما.
لو نفترض ان قيمة الاهلاك المعتمده ضريبيا كانت 1000ج
دا هاايقلل الربح الخاضع للضريبه بمقدار 1000ج
يعنى لو معدل الضريبه 25% دا معناه انى وفرت 250ج
مفهوم الفرصه البديله بقا بيقولك ان ال250 ج دول اللى الاهلاك وفرهملى يعتبروا بالظبط كأنهم 250 جنيه دخلوا الشركه من اول وجديد يعنى القاعده ان اى جنيه بيتم توفيره بيعد بمثابة جنيه جديد دخل الشركه ومن هنا اقدر اعتبر ان الاهلاك ده مصدر للنقديه من منظور اقتصادى بحت.
ماهى الحالات التى يستخدم فيها مفهوم الفرصة البديله
ومن اشهر الحالات اللى بستخدم فيها مفهوم الفرصه البديله وباخد فى اعتبارى الاهلاك كمصدر للنقديه هى حالة المفاضله مابين شراء اله او استئجارها، وكان من ضمن العوامل اللى ممكن تأثر على قرار تفضيل بديل الشراء فى الحاله دى هو الوفر الضريبي اللى هايتسبب فيه الاهلاك.