امتى أروح لدكتور نفسي ؟؟!!!
أو بمعنى اصح إمتى أحس إني عندي اكتئاب وبجد المفروض اتحرك قبل ما حياتي تبوظ
بص يا عم
همة أربع مستويات بالبلدي كدة زي غيار العربية
الطبيعي أنك تبقى متموّر ( على المور يعني والفيتيس بيلألأ في إيدك )
دي الحياة الطبيعية أو الزيرو ليفيل .. ينفع انك تزعل وتحزن فيه .. جدا كمان ..وتقرف من الدنيا واللي فيها .. لكن ده ياخد بالكتير يومين وتعرف ترجع لمودك تاني وتعرف تستمتع بالحياة وبالأكل والخروج والفسح وتكمل شغل ودراسة وفرجة ع الأفلام والأغاني
تمام !!
لكن لو الموضوع استمر اسبوعين متواصلين ومودك وحش ( حاسس بألم الحزن ) ومش عارف تستمتع بالحاجات اللي كانت بتبسطك .. كدة تبقى انت اخدت الغيار الأول وساحب ع الهادي ..خلي بالك انت محتاج اصحابك قوي يبقوا جنبك أكتر من الدكتور .. لو رحت للدكتور مفيش مانع ( احنا الكسبانين) بس هوة غالبا هيدلّك على حاجات تعملها اكتر من الدوا غالبا
.
هيقولك إرجع لاصحابك اللي بتحبهم وركز معاهم شوية
اومال امتى بقى تاخد غيار تاني والموضوع يتطور !!
أول ما تلاقي حزنك خرج من دايرة المشاعر المؤلمة وبدأ يدمّر جسمك
لازم نقلق .. شهيتك مسدودة عن الأكل .. او بقيت مفجوع مثلا .. او مش عارف تنام خالص وبالتالى تركيزك انضرب أو بقيت تنام كتير جدا .. او جالك قولون عصبي او صداع نصفي .. كلها ماشية في سكة ( تدمير الجسد) كدة يا حلو لازم تروح لدكتور بسرعة .. الموضوع ميتسكتش عليه
طب امتى بقى تاخد غيار تالت والموضوع يفتح منك ؟؟
ده يحصل لما حياتك الاجتماعية تدمّر
الاكتئاب مش بس هياكل جسمك
ده هيبدأ يزحف لحياتك الاجتماعية ( تدمير العلاقات والانتاج )
يعني لو بتذاكر يسد نفسك .. لو بتشتغل يخليك تزهق م الشغل .. تبقى مش طايق تخرج مع اصحابك .. تنعزل .. تسيبي جوزك وعيالك ياكلوا من قعر الحلل أو يجيبوا ديليفري ليل نهار ..مش مهتمة بجمالك ولا شياكتك ويمكن كمان انت تبطّل تستحمَّي
رغبتك في المجتمع والناس والانتاج بتنتهي وطاقتك بتخلص
أكيد انتو متوقعين المرحلة الرابعة والأخيرة
ودي اسمها طريق الموت على الهاي واي
يعني خلاص عايز تدمّر أي شىء بشكل حقيقي مش موارب
بدأت تفكرّ في الانتحار أو بتتصرفي بتهور أشبه بالانتحار
غضبك بقى فوق المحتمل وممكن يئذي الناس
عنف عصبية مدمرة .. او حتى توقف عن الأكل والشرب فيما يشبه الانتحار
دي رابع و آخر مرحلة (الدمار الشامل )
لو تاخد بالك .. الاكتئاب كأنه بيقتلنا .. بيهدمنا .. بينهينا .. حاجة كدة ضد الحياة والوجود
وبالعكس
كل كلمة حلوة هية علاج
كل بسمة ..كل فرحة … كل غنوة ورقصة
كل عمل خير .. كل مذاكرة ونشاط ورياضة وشغل وانتاج وحب ومشاعر
كل ده علاج ودوا
والوقاية خير من العلاج
ده ميمنعش إن عربية الاكتئاب لما تجري ..لازملها دكتور يفرملها بفرامل الدوا والجلسات
الكلام ده مش هزار
ولا نحنحة
دي حياتنا
اللي بنعيشها كل يوم
ربنا يسعدنا ببعض في الدنيا دي وينجينا من بعض
دكتور / هاني الزغيدي
طبيب نفسي