اعرف واحد اتجوز من فترة ، ويوم الصباحية مراته سمعته بيقول لأخته على فلوس سلف لحد ما الحوالة توصله من شغله ، قامت مراته استنت لما خلص مكالمته وقالتله اختك هتسلفك من فلوس راجل غريب اللى هو جوزها ؟؟ رد عليها وقالها أنا مسلفها هى وجوزها قالتله وهم لسه مردوهوش !! قالتله بس انت اتزنقت وهم هيزنقو نفسهم علشانك ، وراحت قلعت حاجة من دهبها وقالتله لما ابقى مقفش جنبك ابقى دور على حد تانى يقف جنبك !! انا موجودة عشانك وفضلت بنت الناس تشيل عنه كتير وتقف جمبه وفى الاخير طلقها !! ودلوقت متجوز واحدة منفضاه بمعنى الكلمة وذلاه ، ومبسوط جدًا بيها !!
قالوا قديمًا ” أحدهم تأتيه البركة لكنه يأبي إلا أن يطردها !
فى سؤال إتسأل فى صفحة كان بيقول أول مرة العريس جه اتقدملك جاب معاه ايه ؟؟
بنت قالت إن والدته كلمت والدتي وبعدها بأسبوع اعتقل بس انا كملت وقولت مليش دعوة بالاعتقال وروحتله واخدت بوكس فيه مصحف ومسبحة الكترونية وشوكلت وقالي كان المفروض انا اللي اجيلك ” سامحيني إتخطبنا وبعد سنتين خطوبة اخد حكم مؤبد ’ بس انا مش هسيبه ولا عمري هتخلى عنه عشان بحبه !!
فى بنات جدعان جدًا ’ ولاد أصول — هتلاقيهم شاربين من الطينة الطيبة ’ لما تتجوزها مهما الزمن جه عليكم تلاقيها دايمًا فى ضهرك !! بتقويك وتسندك ’ بتأخدك على المُرة معاها قبل الحلوة — مش بتشوف شكلك ولونك وفلوسك — بتدور على معدنك الطيب -متربية وعينها شبعانة -ايدها فى ايدك على مُر الزمن وقسوة الأيام ❤
وفى بنات مع أول مطب فى حياتك بتلاقى القلم المتين وتقولك السكة اللى تودى — مبتجريش غير ورا رغباتها وحبة المظاهر اللى عاوزة تدارى بيهم كلاكيع قلبها ، وزيهم الرجالة ، عشان كده لما تلاقوا الحُضن اللى تناموا فيه وانتم مطمنين – اوعوا يوم تتخلوا عنه أو تؤذوه ’ حاجوا اوى على كل ايد حنينة بتمسح شقاكم بابتسامة أمل ورضا – وبتطمنكم إن بكرة دايمًا أحسن !! بلاش نعيش بمفهوم الغدر لما حكم صبح الأمان بقشيش .. والندل لما احتكم يقدر ولا يعفيش ” بلاش نطرد البركة من قدام بيتنا وخلينا نحافظ على بقايا الرحمة والأمل والجدعنة اللى قربت تروح !! “