لما تقرر تبعد عن حد ابعد وانت متأكد انك مش ظالم وياسلام لو تبعد وانت مظلوم ابعد وانت مبتسم فى وشه كده من غير خناق ولا انتقام صحيح هتصعب عليك نفسك وقتها عشان هيكون شايفك مش مناسب وانه عرف حد احسن منك أو مبقاش حاسس حاجة ليك مش مهم امشى وانت ساكت الزمن هيدور وهيقابل ناس كتير وكل حد هيقابله هيختلف معاه فى يوم بس الى هيختلف معاه مش هيبقى اصيل زيك ساعتها كل موقف هيحصله هيفتكرك ويقول معملش فيا كده هيحن ليك فى كل مره اتكسر فيها من ناس تانيه وهيندم وانت هتكون سعيد جدا وراضى عن نفسك وانت شايف حقك بيجى قدام عينك من غير تعب ولا ارهاق لنفسك !!
خلى دايماً عقابك هو إنسحابك
أكبر عقاب ممكن تعاقبه لشخص مقدرش قيمة وجودك فى حياته أو مطلعش جدير بثقتك هو إنك تمشى و تسيبه و تنسحب تماماً من حياته .. مادام عاتبته مرة و إتنين و تلاتة و مفيش فايدة يبقى إمشى و ضميرك مستريح .. إحرمه من نعمة وجودك فى حياته .. إحرمه من الضحكة إللى كان بيضحكها معاك .. إحرمه من نظرته ليك .. إحرمه من جدعنتك و وقفتك جنبه .. إحرمه من الكتف إللى كان
بيسنده فى وقت ضعفه .. إحرمه من إحساس الراحة إللى كان بيحسها أما يفضفض معاك .. سيبه يروح يتعرف على ناس تانية و سيبه يفرح بالبدايات معاهم لأن البدايات دايماً مش مقياس كلها تمثيل و أقنعة .. كل ما يعرف ناس أكتر و يتعمق معاهم كل ما هيعرف قيمتك أكتر .. خليه يتفرج على أصدقاء المصلحة و الناس إللى لابسة وشوش .. إمشى و سيبله الذكريات و هى كفيلة تعرفه قيمتك .. و الأيام هتلف و هيدرك إنه خسر حاجة غالية أوى .. مش شرط إنه يجى يعترفلك إنه مفتقد وجودك فى حياته .. بس كفاية إنه بينه و بين نفسه هيبقى متأكد إنه خسرك !!
