ربنا بيقول في القرآن : لكيلا ” لكي لا ” تأسوا علي ما فاتكم ولا تفرحوا بما أتاكُم ..
الشيخ الشعراوي الله يرحمه وهو بيفسر الآيه دي قال قصه جميله .. عن شخص صيني .. الراجل ده كان فلاح فقير علي قد حاله وكان عنده حُصان .. وفـ ليله الحُصان هرب .. إختفي .. فأهل القريه راحوا يهونوا علي صاحب الحُصان فقالهم : وما أدراكم أن ذلك شر ؟ ما يمكن خير !
بعد كذا يوم الحُصان الناس لقوه فرجعوه لصاحُبه وهُما مبسوطين فقالهم : ما أدراكم أن ذلك خير؟ ما يمكن رجوع الحُصان شر ..
تمر الأيام وبن الفلاح صاحب الحُصان يركب عليه فيقع ورجليه تتكسر … فالناس جريوا علي بيت الفلاح يهونوا عليه مصيبته في كسر رجل إبنه إبتسم وقالهم : ما ادراكم أن ذلك شر ؟ ما يمكن كسر رجله خير ..
بعد أقل من اسبوعين تبدأ حرب في الصين .. وتبدأ الدوله تلم في كُل الشباب علشان تحارب في الجيش .. وطبعًا راحوا لإبن الفلاح فلقوه مكسور فمخادهوش معاهم في الجيش ومعظم اللي شاركوا في الحرب دي اتقتلوا لإما إتأسروا ! فيشاء ربنا إن كسر رجل الإبن يبقي خير مُش شر ..
ربنا حكيم .. عالم بالأمور .. علمه واسع ملهوش حدود .. نظرته متخيبش ..
– الشخص اللي بتتمنيه او ونفسك فيه جايز شر ولو إتجوزك هيقرفك ويسود عيشتك ..
– الإمتحان اللي إتأخرت علي ما وصلتله يمكن خير لأنك كنت هتعمل حادثه لو وصلت بدري ..
– الانسان اللي إتخلي عنك في عز ما كُنت محتاجله يمكن خير لأن ربنا كاتبلك إنسان أطيب منه وأفضل ..
– الشغُل .. الموبايل .. اللبس .. تقدير دراستك .. يمكن ضعف مستواك في اي شيئ منهم خير لأن ربنا حفظك من مرض مثلا كان هيجيب أجلك بدري ..
إتأكد تمامًا إن اللي خسرته مكسب وحاجات كتير ممكن مكسبها يبقي خساره .. فمتيأسش علي اللي فاتك ومتفرحش باللي منتاش عارف عيوبه .. لو جبت صوره وقربتها هتلاقي جودتها ضعفت .. ربنا نظرته من قُريب وعالم بالتجاعيد في كُل مشوار إنت مقرب عليه .. وإفتكر الست اللي كان فوق بيتها جاره مؤذيه .. شرانيه كُل يوم تنشر سجاجيد وهدوم وتنقط علي جارتها اللي تحتها .. يوم والتاني خلت الأرض طينه وبلكونة جارتها اللي تحتها غرقانه ميه .. ويشاء ربنا إن بن الجاره الطيبه يلعب في الشقه فيقع من البلكونه علي الأرض تحت البيت ! أمه تجري بيه علي المستشفي الدكتور يقولها إحمدي ربنا .. إبنك ربنا نجاه من الموت لأنه وقع علي أرض طينه طريه فخففت أثر الوقعه عليه والاصابات خفيفه وهيقوم زي القرد ! .. وبالمناسبه مبروك عليك جبال الحسنات اللي أخدتها من الملائكة اللي بتدعيلك دلوقت ودعواتهم باذن ربي مستجابه .. اللهم بكرمك إدهشني ولغيرك لا تحوجني