تسمح تولع لي؟ – الجزء الثالث

هنكمل كلامنا عن التدخين، اتكلمنا في الحلقة السابقة عن الصورة الذاتية، وأنها ممكن تكون السبب الرئيسي في أننا

بندخن، يعني احنا بندخن عش أن شايفين نفسنا – أصلا– مدخنين. وقلنا أن تغيير الصورة الذهنية بسيط جدا، غمض عينك قبل النوم، وتخيل نفسك شباب وصحتك فل وبتطلع السلالم جري.

بس!

قلنا أن التدخين مش إدم أن قوي، دي مجرد عادة، ودلوقتي هنتكلم عن كيفية تغيير العادات.

كيف لا تبطل التدخين؟

أكتر حاجة بتخلي تبطيل التدخين صعب, أنه (تبطيل(
فاهمين قصدي؟

يعني فكرة أن الواحد (يبطل) حاجة هو متعود عليها, فكرة منفرة وسيئة أصلا، دي حاجة من قوانين العقل الباطن بيسموها قانون التعلق، يعني لو خطفت من عيل صغير لعبته, هتلاقيه بيعيط، وأنا لو خطفت منك الكمبيوتر وأنت بتقرا الموضوع ده، هتتضايق. هي دي الفكرة، أن الواحد مننا بيتضايق من فكرة أنه (يفقد) حاجة، حتى لو كان اللي بيفقده ده، عادة زي التدخين.

الحل هنا هو أنك ماتبطلش تدخين؟ يعني إيه؟ يعني أنت مش هتبطل تدخين؛ لأنك مش مدخن أصلا، يعني إيه برضه؟
يعني أنت مش هتبطل التدخين ده، لأ، أنت هترجع لطبيعتك

شوف يا صاحبي، فاكر أيام ما كنت طفل صغير؟  ماكنتش مدخن، يعني  أنت غير مدخن أصلا، هل أنت اتولدت وأنت ماسك سيجارة في إيدك؟
لأ طبعا، يعني أنت جيت الدنيا دي جسمك صحي جدا جدا، تحب ترجع زي ما كنت؟

 
كسر العادات
أول خطوة هنا هي أنك تكسر العادات، التدخين عادة،
–  متعود تشرب بعد الأكل؟
–  مع الشاي؟
 – بعد الخناقات؟
 – وأنت بتفكر؟
اكسر العادات دي، يعني بدل ما تشربها بعد الأكل، اشربها قبل الأكل.

متعود تشتري السجاير من شخص معين؟
لأ، اشتريها من واحد تاني

بتشرب نوع تقيل؟
لأ، جيب نوع أخف

بتشرب في المكان الفلاني؟
لأ، اشرب في المكان العلاني

الهدف هو أنك تتخلص من فكرة أنك بتخليها عادة، غير في العادة، ودي الخطوة الأولى.

شيل وحط

عشان تسهل على نفسك تغيير عاداتك, خد عندك الطريقة السهلة دي، لما تبطل عادة, حط عادة تانية مكانها، بس كده، يبقى كانك بتقول لعقلك اللاواعي “أنا ماخسرتش أي حاجة أصلا”

لو حبيبتك سابتك مثلا، ممكن تتألم من مشاعر الفقد، لكن عش أن تقلل المشاعر دي وتلغيها اعمل أي نشاط جديد عشان تتخطى المرحلة دي عاطفيا وتسهل على نفسك الموضوع، العب رياضة، قابل ناس جداد، سافر، أي حاجة تحطها مكان الحاجة اللّي اتفقدت، كده ببساط ة  عايز توقف عادة التدخين؟ حط عادة تانية مكانها

أقراص النعناع
عارف الباستيليا؟ أي نوع قوي من النعناع، في الأوقات اللي متعود فيها على التدخين, خد لك واحدة نعناع قوي, تشطشط بقك، واشرب بعدها كوب ماء بارد، هتلاقي لها نفس إحساس السجاير بالضبط، تخيل بقى؟ بس اوعى تدمن النعناع والباستيليا، وأضطر أكتب لك حلقة عن تبطيلهم :)

اعمل أي عادة تانية بدل العادة اللي هتبطلها، زي أنك تكلم شخص معين في التليفون مثلا، في الأوقات اللي متعود فيها تشرب السجاير، حاجة بسيطة، لكنها فعالة جدا؛ لأنها هتملا مكان العادة اللي اتغيرت  

من النهارده ابدأ في عمل هذه الخطوات البسيطة جدا، وهتلاحظ الفرق