دليل المحاسب المحترف
بقلم:A.RAFIK
هوة مين اللى جبرك تدخل المجال دة يا منعم؟ انت حابب المجال دة ولا هوة على راى المثل: ” ايش جبرك على المر الا الأمًر منة“.بص يا ابن الحلال فى الحالتين انت دخلت برجليك، واللى متقدر هوة اللى حيكون، بس انا عايز أقول لك على شوية حاجات كدة عشان تظبط نفسك
.
كتير اوى قدروا يحققوا فيها مراكز قوية ورواتب محترمة وقيمة علمية كبيرة، وناس تانية ماعرفتش تحقق اللى حققة الاخرين.وعلى فكرة كلهم كانوا زيك كدة يا اما دخلوها وهما راضيين او مش راضيين لكن ممكن بحاجات بسيطة كدة تظبط نفسك وشوية مجهود تبقى فلة شمعة منورة.
1- دة انجليزى دة يا مرسى؟
من اولها كدة الانجليزى بتاعك لازم تظبطة، تشوفلك كورسات تسمع لك اغانى اجنبى تذاكر مع نفسك شرايط فيديو تعليمية، وتدور بقى على النت حتلاقى موسوعات فى تعليم اللغه الانجليزية، انا مش حاشوف لك كمان واقول لك اتفضل لحد عندك وفى الاخر تركنة وتنسى، فلو انت عايز فعلا تكمل الموضوع دة لازم تعرف انك حتتعب شوية.
2- “نحو” أمية الكمبيوتر
طبعا ماحدش يفهم غلط بس يعنى المقصود انك تعرف فى الكمبيوتر، يعنى الويندوز، يعنى الدوس، يعنى الاوفيس، يعنى قطع ومكونات الكمبيوتر، وسمعنى احلى سلام لمايكروسوفت، اللي رافعة راس شباب مصر، بشهادات وحركات جامدة، يعنى اليونيسكو، اللى بيمسى علىICDL ، يعنى شهادة، شهادة معتمدة، يعنى بتقول انك بتعرف تسوق الكمبيوتر كويس، بتعرف تسوق؟ طب معاك رخصة؟ هيه دى الرخصة اللى انت محتاج تشيلها معاك ومطلوبه جدا فى سوق العمل…….. رخصك بقى لوسمحت واركن على جنب.
3- أوعى يغرك جسمك
اوعى تفتكر انك بالانجليزى والكمبيوتر بقيت الواد اللى محصلتش، فى زيك كتير دلوقتى عارفين الاثنين، وكلة بيشترى كمبيوتر وبيتعلم انجليزى وبياخد كورسات، مش دى القضية دلوقتى. من الأخر بقى روح ارمى نفسك فى اى مكتب محاسبة حتى لو كان مش حيديك فلوس حتى لو بدوام جزئى، اقبل اى حاجة البلد مافيهاش شغل الايام دى، بدل ماتجيلك شغلانة تبهدلك، روح الى اللى انت عايزة وانت رايحة برجليك وعارف انت رايحة لية، مكاتب المحاسبة فى البلد كتير، ابتدى دور حوليك فى المنطقة وظبط نفسك.
4- انا مبسوط كدة، انا مرتاح كدة
يا سلام ما اجمل انى اكون عارف لغة وكمبيوتر وباشتغل فى مكتب محاسبة كبير او صغير.
ابوس ايدى وش وظهر، انت بتقول اية؟ يا بابا انت عقبال ما اتعلمتلك الشوية اللى انت عرفتهم دول العالم جرى كتير واتقدم كتير وفى حاجات ظهرت جديدة، انت عقبال ما تاخد خطوة بيكون الناس التانية دول اخدوا ستين خطوة. انت فين بقى بالنسبة للناس التانية دول؟ الشغل دلوقتى محتاج مهارات، وأكثر مهارتين مطلوبين دلوقتى فى مصر طبقا لاحصائيات مركز دعم المعلومات واتخاذ القرار هما: مهارات الاتصال ومهارات التفاوض أكيد انت نفسك محتاج مهارات خاصة مافيش قدامك غير يا اما تاخد برضة كورسات فى المهاراتSoft Skills او تقعد تقرا فى النت فى مقالات كتير اوى عن الحاجات دى ودروس صوتية وفيديو كتير جدا.
5- البكالوريوس مابيأكاش عيش
لازم تعرف ان شهادة البكالوريوس دى اللى معاك مابتنفعش ببصلة دلوقتى فى اى حتة، ماينفعش تشتغل بس وانت معاك بكالوريوس، دة لو انت عايز تشتغل فى حتة كويسة ومحترمة، بص لازم تعمل دراسات عليا او دبلومة فى تخصص المحاسبة، او كورسات فى المحاسبة المتقدمة… لازم تبتدى على طول تحضر وتجهز ليها.ولو مش عاجبك التخصص الاكاديمى دة يبقى عليك وعلى الشهادات المهنية زىCMA,CPA,CIA,CFA,CFM .ومافيش مانع تجمع بين الاثنين الدرجة الاكاديمية والشهادة المهنية وعلى فكرة دة التوجة الجديد فى العالم انة يكون معاك جزء اكاديمى وجزء مهنى.
6- حتكسب دايما ماتقلقش
ياعينى عليك لما تبقى بقى واد لعيب، عارف محاسبة وعارف كمبيوتر ومش بس كمان انجليزى لأ تبقى عارف بقى تستخدم البرامج المحاسبية المشهورة، شويةQuickBooks علىPeachtree تبقى كدة زى العسل.فى حتلاقى على النت البرامج نفسها وشرحها فيديو وكتابة، وفى دورات ليها برضة كويسة جدا.
يا سلام برضة لو تعرف تصمم نظام محاسبة برضة على الاكسيل، Computerized Accounting تبقى فاهم الاكسيل تستخدمة ازاى فى المحاسبة.. تبقى جامد طحن، ماتقلقش كلة حتلاقية على النت وفى مراكز تدريب.
7- انت كدة واصل، ناقص لك زرار
حلو جدا انك بقيت متمكن من نفسك كدة، يعجبنى فيك مثابرتك على انك تكمل قراءة الموضوع دة.
شوف بقى انت وصلت فين دلوقتى وعملت كام خطوة، حتلاقى برضة الدنيا اتطورت بسرعة وفى حاجات جديدة بتحصل فى العالم.لازم على فكرة تبقى موصول على طول باخر المستجدات فى مجالك.
يعنى دلوقتى بقوا يستغنوا عن البرامج المحاسبية ويحطوا فى شركاتهم برامج أكثر تطور من هذة البرامج زى Oracle E-BusinessوايضاMicrosoft Dynamics Great Plains / Axapta أو Sage أوPeople Soft أوSAP.دى برامج كلها بتسمى برامج اداره موارد المنشأت ERP، و دى زى ما بيقولوا “التطور الطبيعى للحاجة الساقعة” او بمعنى اخر التطور الطبيعى للانظمة المحاسبية.
8- قوانينك يا معلم
انت راجل بقيت فاهم، خد دى فى ودنك بقى وماتقولهاش لحد، بلدك بتاعة قوانين صح، شوف اية القوانين اللى بتحكم شغلتك، اية القوانين اللى شغالين بيها فى البيزنس يعنى مثلا:
* معايير المحاسبة والمراجعة المصرية
* معايير المحاسبة والمراجعة الدولية
* قانون العمل
* قانون التامينات الاجتماعية
* قانون الضريبة على الدخل
* قانون ضرائب المرتبات والمبيعات
* القانون التجارى
*قانون الهيئة العامة للاستثمار
* قانون سوق المال
كدة انت تبقى واد أدرجى وعايز اقول لك حتبقى راجل مش بس محاسب لأ مستشار، لأن اللى بيعرف فى الحاجات دى بس من غير اى حاجة تانية بيبقى معدى من الاخر ومتظبط. ظبط نفسك ووقتك وابتدى اقرا فى حاجة حاجة كدة على رواقة بدل ما ييجى وقت وتحتاج تفهمهم وتقراهم فى وقت زنقة.
9- محاسب عربى؟ أطلع برة
أوعى تكون مابتعرفش المحاسبة بالانجليزى؟ أزعل منك ، مش معقولة تبقى انت بتعرف انجليزى ومش عارف جميع مصطلحات المحاسبة بالانجليزى ، ظبط كام كتاب او قاموس انجليزى عشان تعرف اية المصطلحات بالانجليزي. دى مهمه جدا عشان تتقبل فى الشركات الـ Multi National.
10-سوَق لنفسك
ابتدى بقى اعمل لك سيرة ذاتية محترمة بالانجليزى عنك وعن تعليمك وخبراتك وشهاداتك وهكذا.
وقوم بتحضير الاسئلة الانترفيو اللى ممكن يتعمل لك فى اى وقت، وتكون مجهزها بالاجابات عشان برضة تبقى عارف تجاوب ازاى، ماتتكسفش انك تكتب الاسئله فى ورقها وتكتب اجابات ليها من عندك عشان برضه تحفظها وماتضربش لخمه، برضه اعمل لك سايت او بلوج على النت واكتب وعبر عن نفسك فيه وعن خبراتك وحاول تعمل له اشهار على النت. الحاجات دى تأثيرها بيبقى قوى برضه، ممكن صاحب العمل يحب يعرف معلومات عنك اكثر مثلا فيجرب يكتب اسمك على الانترنت…. جرب كده واكتب اسمك على الانترنت.
11-اللابتوب
ابتدى بقى دور على لابتوب محترم عشان شغلك كل حيبقى علية، الف مبروك حتبقى راجل استشارى.
وتجهز “عقد محاسب” عشان اللى عايز يتعاقد معاك مثلا ، أسطوانة بها فايلات اكسيل تساعدك فى التحليل المالى او فى عمل نظام محاسبى لاى شركة، شويه برامج محاسبيه تخليها معاك فى اللابتوب عشان تفرج العملاء بتوعك عليها.
كدة يبقى انت باذن الله لو اتبعت الخطوات دى اضمن لك انك تكون من الناجحين فى مجال المحاسبه… وعقبال لما نشوفك مستشار فى اكبر الشركات فى مصر والعالم العربى.
